Saturday 2 August 2008

جاتك الارف

على حد علمى
احنا و اسرائيل حبايب
و فيه سلام و ما فيش حرب
طب الظباط و العساكر دول بيعملوا ايه
في ميدان طلعت حرب
ده بنت و ولد نازلين يشوفوا بلوزة تليق ع الايشارب
بيحلموا .. بيغنوا
و احلي ما فـ غناهم انه طالع من القلب
من امتي العشق كان بيموت من الخوف
و منا امتي الحلم كان بيخاف من الضرب
يا كابتن
يا باشا
خليك ابن بلد
هوه انتا ما عندكش اخوات
صبيان
و لابنات
يعني انتوا كل عيلتكوا ظباط
يعني انتوا اصحاب اكاديمية الشرطة
و اصحاب الشوارع
و الميادين
و المحلات
و اصحاب البلد
طيب
طب ان هاخرم من التحرير لدار القضاء العالي
هاكل كشري و اخش سيما
مالك بقي و مالي
معايا بطاقة و خلصت الجيش
بتسمي ده أكل عيش
يبقي عرفتك
طب عريني بقي
فتشني
قطع لي هدومي
و افحصني
و خلصني
لا انت اول و لا اخر واحد
عارف
انا مرة القطر عدي و داسني
و ما متش
عشق الحياة ماهوش ترف
عرفت ايه معني الشرف

No comments: